1 你唔等錢洗

 初期freelance工作未上軌道，且往往不是每月準時出糧，故必先儲定一筆本錢，給自己時間找客源，調整工作和生活模式。又或者，你是那種寧願賺少啲，但多啲自由時間去進修、照顧家庭或周遊列國之人，就比較合適。假如要靠份糧供樓還咭數養家，除非你是特別吃香的人才，返全職可能比較穩妥。

2 你唔怕One-man Band

唔使理啲麻煩同事和俾老細糟質固然可耳根清靜，心境平和，不過不是每個人也能適應與世隔絕、可以一日唔講嘢的工作模式。況且，做freelancer 代表sales又係你，admin又係你，account和茶水部都係你，無人同你分工亦唔可以卸膊，故比較適合喜歡凡事親力親為，不怕One-man Band的「自閉」之人。

3 你夠自律

 不要以為唔使打卡報到就代表可以瞓到黃朝白晏，彈性時間唔代表唔使用時間！Deadline仍然與你常在。想freelance jobs長做長有，反而更需要自律和時間管理，下下臨急抱佛腳開夜車只會捱壞身體，搞不好一星期做足七日衰過返full-time。假如你是那種唔踢唔郁，想weekend和公眾假期真正放假之人，那freelance未必適合你。

4 你已有可靠人際網絡

Freelancer客源往往是做full-time時累積下來的，保持工作質素，自然人傳人有job送上來。故轉型之前必先確保自己沒有做壞個「名」，有客信得過你，而且向朋友放定聲氣，搭通天地線才有穩定客路。

5 你唔怕無職升

Freelancer通常是那種不計較回報只想做自己想做的事的實幹型，假如想每年定期升職加薪，福利優厚，想有班下屬俾你管卻不需自負盈虧，便不太合適。

要成為一個成功的Freelancer，本文章所述之5點值得參考。身邊都有以Freelance為職的朋友，有成功也有失敗的個案，成功或失敗的原因都似乎不離上述5點，但還想補充多一點: “自省”, 自律和自省很接近，自律可解釋為「自我規律」；自省可解釋為「自我反省」。相信一個成功的Freelancer必定要圍繞這兩個原則做人處事，才不會過份放縱自己，才能成就一個成功的Freelancer。

(部份內容摘錄自網上流傳文章, 經作者改編整理及詮釋。)

游紹永博士

香港科技專上書院顧問

電郵: joseph.swyau@gmail.com

(全文字數: 837)

16/08/2022